Tá fógartha ag an Údarás Rialála Seirbhísí Maoine go bhfuil a Thuarascáil Bhliantúil do 2024 foilsithe aige. Tugann an tuarascáil forbhreathnú ar ghníomhaíochtaí agus aschuir an Údaráis le linn 2024.
Ag trácht dó ar fhoilsiú na Tuarascála Bliantúla, dúirt an tUasal Michael Quinlan, Cathaoirleach Bhord an Údaráis:
"Le linn 2024, lean an tÚdarás de bheith dírithe ar a fhreagrachtaí reachtúla a chomhlíonadh, agus dul chun cinn suntasach á dhéanamh aige i dtreo ár spriocanna straitéiseacha a chur i bhfeidhm. Leanann an tÚdarás de chóras ceadúnaithe cuimsitheach a sheachadadh, mar aon le tiomantas leanúnach agus cur chuige réamhghníomhach i leith cosaint tomhaltóirí agus maoirseacht agus gairmiúlacht a choinneáil san earnáil seirbhísí maoine."
Gné lárnach de chumhachtaí rialála an Údaráis is ea imscrúdú a dhéanamh ar Sholáthraithe Seirbhísí Maoine (ceantálaithe, gníomhairí eastáit, gníomhairí ligean ar cíos agus gníomhairí bainistíochta maoine) agus i rith 2024 lean an tÚdarás Rialála Seirbhísí Maoine de bheith ag déanamh imscrúduithe gníomhacha ar iompar míchuí. Maidir leis seo, chríochnaigh an tÚdarás breis is 270 imscrúdú gearán agus breis is 370 iniúchadh comhlíontachta.
I measc buaicphointí agus staitisticí suntasacha eile i dTuarascáil Bhliantúil 2024 tá:
- Beagnach 1.7 milliún cuairteoir ar Chlár Praghsanna Maoine Cónaithe.
- 6,049 iarratas ar cheadúnas (nua agus athnuachana) próiseáilte.
- 375 imscrúdú iniúchta comhlíontachta ar Sholáthraithe Seirbhísí Maoine críochnaithe.
- 274 imscrúdú gearán i gcoinne Soláthraithe Seirbhísí Maoine críochnaithe.
- 406 iniúchadh Frith-Sciúradh Airgid curtha i gcrích ag an Údarás.
- 8,332 Tuairisceán Léasa Tráchtála foilsithe.
Agus í ag machnamh ar ghníomhaíocht an Údaráis le linn 2024, thug Ms. Maeve Hogan, Príomhoifigeach Feidhmiúcháin an Údaráis, faoi deara:
"Ba bhliain rathúil eile í 2024 don Údarás agus gabhaimid ár mbuíochas lenár gcomhaltaí Boird as a ndúthracht dhílis agus a gcuid ranníocaíochtaí luachmhara, mar aon le foireann an Údaráis a chinntíonn, trína ndúthracht agus a dtiomantas leanúnach, go seachadtar torthaí ardchaighdeáin don eagraíocht i gcónaí."
Tá an Tuarascáil Bhliantúil do 2024 ar fáil ag www.psr.ie.