Pionós Mór-Smachtbhanna €10,000 a gearradh ar Ghníomhaire Eastáit i ndiaidh Imscrúdaithe
Fuair an tÚdarás Rialála Seirbhísí Maoine (an tÚdarás) gearán i gcoinne an Uasail Gabriel Dooley de chuid Gníomhairí Eastáit Dooley a bhí lonnaithe i Liathchlocha, Co. Chill Mhantáin.
Fuarthas an gearán ó leachtaitheoir cuideachta a d’íoc €50,000 leis an Uasal Dooley chun tailte a cheannach, ach nár críochnaíodh an díol. Bhí Ordú ón Ard-Chúirt á lorg ag an leachtaitheoir inar ordaíodh don Uasal Dooley an éarlais áirithinte €50,000 a aisíoc leis an leachtaitheoir, rud a deonaíodh. Dhiúltaigh an tUasal Dooley an éarlais áirithinte a scaoileadh. Ina dhiaidh sin, fuair an tÚdarás an gearán ón leachtaitheoir.
Nuair a fuarthas an gearán, rinneadh imscrúdú iomlán, agus ina dhiaidh sin rinne Bord an Údaráis fionnachtain amháin maidir le hiompar míchuí i gcoinne an Uasail Gabriel Dooley i ndáil le sárú Rialachán 6(6) de na Rialacháin um Acht na Seirbhísí Maoine (Rialáil) 2011 (Airgead Cliant) 2012. Bhí sé seo mar gheall ar airgead a tharraingt siar ag an Uasal Dooley le linn tréimhse áirithe ón éarlais áirithinte €50,000, a bhí á choinneáil i gcuntas bainc a chliaint, sular síníodh agus/nó sular tugadh conarthaí chun críche maidir le díol na talún.
Agus an smachtbhanna cuí á chinneadh, chuir Bord an Údaráis fachtóirí éagsúla san áireamh mar atá leagtha amach in Alt 73 den Acht um Sheirbhísí Maoine (Rialáil) 2011. Ar scór sin, chuir an Bord smachtbhanna mór i bhfeidhm ar an Uasal Gabriel Dooley. Dé Luain an 21 Iúil 2025, dheimhnigh Uachtarán na hArd-Chúirte cinneadh an Bhoird maidir le smachtbhanna lenar gearradh pionós airgeadais €10,000 ar an Uasal Dooley, a d’íoc an tUasal Dooley leis an Údarás roimh an Ordú Deimhnithe.
Is mian leis an Údarás a mheabhrú don phobal, nuair a íocann siad taiscí áirithinte/urrúis le soláthraí seirbhísí maoine, go gcinnteoidh siad go bhfuil ceadúnas acu ón Údarás trí Chlár na Soláthraithe Seirbhísí Maoine Ceadúnaithe a sheiceáil ar a shuíomh Gréasáin www.psr.ie. Ina theannta sin, má bhíonn aon fhadhbanna ag an bpobal le soláthraí seirbhísí maoine ceadúnaithe, is féidir leo teagmháil a dhéanamh leis an Údarás trí ríomhphost ag [email protected] .
CRÍOCH